الرعب هوا اسم علمى للخوف
الخوف بيختلف من انسان لاخر .... فيه خوف المشاعر يعنى واحد بيخاف على اللى بيحبه ... فيه
خوف من اللى اكبر منك رئيسك .. وزيرك .. مديرك ... بابا وماما ... وهكذا
فيه الخوف من بكرة الخوف من المستقبل وده يعتبر اشد انواع الخوف على الاطلاق
فيه الخوف من الحيوانات
الخوف من المطر
الخوف من الليل .. الخوف من الضلمه الظلام يعنى
فيه الخوف من دم
الخوف من الفيران ودة خاص شويه بالسيدات والبنات ومش كلهم
يعنى ملاحظين ان انواع الخوف والرعب كتيرة اوى
ذكرنا انواع الخوف
لكن لسه مقولناش انواع الرعب
الرعب الازلى
الرعب الازلى او الرعب الاولى هوا احسن انواع الرعب .... لانه رعب فطرى ... رعب الانسان الاول
فيه رعب اسمه الرعب النظيف ... او التوتر النظيف اللى هوا خالى من الدماء
يعنى مثلا هوضحلكوا بمثال
لو انتا مثلا ماشى فى الغابه .... انهى اللى هيرعبك اكتر؟
انك تسمع زئير الاسد ولا اما تشوفه ادامك؟؟؟؟؟؟؟
انا عن نفسى
شايف ان اشوفه قدامى احسن بمراحل .. لان سماع زئير الاسد انتا مش عارف هوا فين اساسا ولا ممكن يجيلك من انهى حته ... ده هوا الرعب او التوتر النظيف .... خوف داخلى من المجهول
اما بقى لو شفته هتترعب برضه لكن المرادى انتا شايفه وعارف هتتصرف معاه ازاى
بس الخوف هنا بقى
بيبقى الخوف من النتيجه .... او ممكن من الموت؟
والرعب يعتبر غريزة اساسيه فى الانسان
لو شبهناها بمثال ... لما تتفرج مثلا على فلم رعب
تيجى عند اكتر حته فيها رعب وتقوم قافل الجهاز علطول
وبعد كدة
ترجع تقول لنفسك الله طب هيجى ايه يعنى يعنى هوا هيطلعلى من الشاشه
وترجع تكمل فرجه
طب اساسا انتا ليه بتتفرج على الفلم؟ لانك عايز كدة ... عايز تترعب
وتفتكروا ليه الناس بتدفع فلوس علشان تتفرج على افلام الرعب فى السينمات؟
طب تفتكروا ليه الشباب بتدفع فلوس وتشترى روايات الرعب؟
زى الاطفال الصغيرة بالظبط لما تيجى امهاتهم يحكيلهم حكايه قبل النوم
الام تسال ابنها احكيلك ايه النهاردة يا حبيبى ؟ حكايه الشاطر حسن؟
نلاقى الواد يقولها لالالالا حسن مين وبتاع مين ... انا عايز حكايه امنا الغوله
وتبتدى تحكهاله ... ييجى فى النص الواد يصرخ كفايه يا ماما خلاص انا خايف
الام تسكت شويه ويقولها طب كملى طيب .. وهكذا
يبقى عرفنا ان الرعب دة شئ فطرى وغريزى واساسى عندنا واحنا الى بنطلبه وبنسعى وراه
وخدوا بالكوا
اكتر حاجه مخيفه فى الرعب
هوا الخيال
خيال الانسان هوا اللى بيتحكم فى رعبه ... عشان كدة نلاقى ان درجات الرعب عند البنى ادمين مختلفه نتيجه اختلاف درجات خيالهم
يعنى مثلا ....
نلاقى ولد راح يتفرج على فلم رعب ... يبنى بلاش بلاش ايه انا عيل؟ انا راجل ومبخافش
ويشوف فلم الرعب ويضحك طول الفلم .. ايه دة الواد فعلا مش بيخاف
يرجع البيت شوفتوا مش قولتلكوا؟ طيب يا سيدى خش نام يالا
تروح مامته منيماة وقافله النور
يقعد يتخيل احداث الفلم ...الله .. طب افرض الكلام دة حصلى؟ طب ايه اللى يمنع انه يحصلى الموقف الفلانى؟
شويه نلاقيه ينده على مامته يا ماما ونبى سيبيلى النور مفتوح
شويه يسمع حاجه بتتكسر يتنفض من على سريرة ... ومع اول صوت غريب يسمعه نلاقيه يصرخ
الحقووووووووووووونى